کلٹی تھانہ حلقہ کے نعمت پور پولیس چوکی کے تحت اکون بگان کھٹال علاقے میں گزشتہ شب ایک دکان میں چوری کی واردات سے علاقے میں سنسنی پھیل گئی۔ چوروں نے اومیش یادو نامی دکاندار کی دکان کو نشانہ بناتے ہوئے چھت پر لگے ایس بسٹس کو توڑ کر اندر داخل ہوئے اور نقدی لے اڑے۔
دکان مالک اومیش یادو کے مطابق جب وہ بدھ کی صبح تقریباً نو بجے اپنی دکان کھولنے پہنچے تو اندر کا منظر دیکھ کر دنگ رہ گئے۔ دکان کی چھت کا ایس بیسٹاس ٹوٹا ہوا تھا اور گلے میں رکھی تقریباً 14 ہزار 500 روپے نقدی غائب تھی۔
اس واقعے کی سی سی ٹی وی فوٹیج بھی سامنے آئی ہے جو سوشل میڈیا پر تیزی سے وائرل ہو رہی ہے۔ فوٹیج میں صاف طور پر دیکھا جا سکتا ہے کہ ایک شخص دکان کے اندر داخل ہو کر اپنے موبائل فون کی ٹارچ روشن کر کے قیمتی سامان اور نقدی کی تلاش کر رہا ہے۔
اطلاع ملتے ہی نعمت پور چوکی کی پولیس موقع پر پہنچی اور جائے واردات کا معائنہ کیا۔ پولیس نے سی سی ٹی وی فوٹیج اپنے قبضے میں لے لی ہے اور ملزم کی شناخت کر کے اسے گرفتار کرنے کے لیے تفتیش شروع کر دی ہے۔
واقعے کے بعد علاقے کے تاجروں میں تشویش پائی جاتی ہے۔ تاجروں نے پولیس سے مطالبہ کیا ہے کہ علاقے میں گشت میں اضافہ کیا جائے تاکہ اس طرح کی وارداتوں پر روک لگ سکے۔
