ریاستی حج انسپکٹر محمد شہنواز کی والدہ کا انتقال پُرملال
شمالی آسنسول کے جہانگیری محلہ سےتعلق رکھنے والےاسٹیٹ حج انسپکٹر اور قاضی نذر الاسلام پرائمری اسکول کے مدرس الحاج ماسٹر محمد شہنواز عالم کی والدہ محترمہ جمعرات کی دوپہر تقریباً دیڑھ بجےاس جہان آب وگل کوہمیشہ ہمیشہ کے لیے خیرباد کہہ کر اپنے معبود حقیقی سے جا ملیں۔اسی شب دس بجے جہانگیری محلہ قبرستان میں سپردِ خاک کی گئیں۔ جنازے میں ہرمکتبہ فکر کے لوگوں کی اچھی خاصی تعداد موجود رہی۔شہنواز عالم کے ماموں محمد زاہد اختر(ٹی ٹی ) نے بتایا کہ ان کی ہمشیرہ ایک عرصہ سے صحت کے کئی مسائل سے دوچار تھی اور مسلسل علاج میں رہتے ہوئے بہت حد تک نارمل زندگی گذار رہی تھی۔ جمعرات کے دن انکی آنکھ کا آپریشن ہونا تھا۔چنانچہ ان کا فرزند محمد شہنواز انہیں لےکر اسپتال گئے مگر آپریشن سے قبل ان کے پریشرمیں بہت کمی دیکھ کر ڈاکٹر نے آپریشن نہ کرنے کا مشورہ دیا۔ اسی حالت میں انہیں گھر واپس لاکر بستر پرلٹا دیا گیا۔ آرام ملنے پر انہیں نیند آگئی مگر گھر والوں کو کیا پتہ تھا کہ یہ نیند ابدی نیند ثابت ہوگی اور ان کی روح پرواز کر جائے گی۔ واضح ہوکہ شہنواز کے والد محمد عرفان انصاری کا بہت پہلے انتقال ہوچکا ہے۔
