درگاپور کے آئنسٹائن روڈ علاقے میں واقع ایک برقی سامان کی دکان میں اچانک آگ لگنے سے علاقے میں سنسنی پھیل گئی۔ اس حادثے میں دکان کے اندر رکھا کافی سامان جل کر خاک ہو گیا اور دکان کو بھاری نقصان پہنچا۔ اطلاع ملتے ہی فائر بریگیڈ کا ایک انجن موقع پر پہنچا اور کافی دیر کی کوششوں کے بعد آگ پر قابو پا لیا گیا۔ تاہم آگ کی شدت کے باعث دکان کا آدھے سے زیادہ حصہ جل کر تباہ ہو گیا۔
مقامی دکانداروں کے مطابق اتوار کی دوپہر تقریباً ساڑھے تین بجے کے قریب محلے کے کچھ بچے دکان کے پاس کھیل رہے تھے۔ اسی دوران انہوں نے دکان کے اندر سے دھواں نکلتے دیکھا۔ بچوں نے فوری طور پر علاقے کے لوگوں کو اطلاع دی جس کے بعد مقامی لوگوں نے فائر بریگیڈ کو خبر دی۔
فائر بریگیڈ کے ابتدائی اندازے کے مطابق یہ آگ ممکنہ طور پر شارٹ سرکٹ کی وجہ سے لگی ہے۔ واقعہ کی جانچ جاری ہے جبکہ نقصان کا اندازہ لگایا جا رہا ہے۔
