ریلوے انتظامیہ کی جانب سے مبینہ طور پر اپنی زمین پر قائم بستیوں کو بلڈوزر چلا کر منہدم کیے جانے کے خلاف جمعہ کے روز کانگریس کارکنوں نے ضلع مجسٹریٹ دفتر کے سامنے احتجاجی مظاہرہ کیا اور متاثرہ خاندانوں کی بازآبادکاری کا مطالبہ اٹھایا۔
قومی کانگریس کے ریاستی سکریٹری پرسنجیت پویتونڈی نے میڈیا سے گفتگو کرتے ہوئے کہا کہ چند روز قبل ریلوے انتظامیہ نے اپنی زمین پر گزشتہ تقریباً پچاس برسوں سے رہائش پذیر قریب 400 غریب خاندانوں کے مکانات اچانک بلڈوزر کے ذریعے منہدم کر دیے، جس کے سبب سینکڑوں لوگ بے گھر ہوگئے ہیں۔
انہوں نے الزام عائد کیا کہ بی جے پی حکومت ’’رام راج‘‘ کے نام پر اتر پردیش کی طرز پر غریبوں کے مکانات مسمار کرنے کی پالیسی مغربی بنگال میں بھی نافذ کرنا چاہتی ہے، لیکن ریاست میں ایسی ’’بلڈوزر پالیسی‘‘ کو کامیاب نہیں ہونے دیا جائے گا۔
کانگریس نے مطالبہ کیا کہ بے دخل کیے گئے تقریباً 400 خاندانوں کو فوری طور پر متبادل جگہ فراہم کرکے ان کی بازآبادکاری کو یقینی بنایا جائے۔ پرسنجیت پویتونڈی نے کہا کہ ضلع مجسٹریٹ نے اس مسئلہ پر بات چیت اور بازآبادکاری کے امکانات پر غور کرنے کی یقین دہانی کرائی ہے۔
اس احتجاجی پروگرام میں کلٹی کے روی یادو، آسنسول میونسپل کارپوریشن کے کونسلر ایس ایم مصطفیٰ سمیت کانگریس کے متعدد کارکنان اور مقامی افراد شریک تھے۔
