دُرگا پور کے دھوبی گھاٹ علاقے میں جمعہ کی شام ایک لرزہ خیز واقعہ پیش آیا جہاں ایک گھریلو ٹیچر نے مبینہ طور پر اپنی بیوی کا قتل کر کے سیدھا تھانے پہنچ کر خود کو پولیس کے حوالے کر دیا۔ اس واقعے نے پورے علاقے میں سنسنی پھیلا دی ہے۔
پولیس ذرائع کے مطابق ملزم کا نام دُرگا داس کر ہے جو پیشے سے پرائیویٹ ٹیچر ہے۔ مقتولہ بیوی کی شناخت مُکُل کر کے طور پر کی گئی ہے۔ عینی شاہدین اور مقامی لوگوں کا کہنا ہے کہ خاتون کو کسی تیز دھار ہتھیار، ممکنہ طور پر چھری یا کٹاری سے قتل کیا گیا ہے۔
اہلِ علاقہ کے مطابق مُکُل دیوی کو ہمیشہ خوش مزاج اور ہنستے ہوئے دیکھا جاتا تھا، لیکن جمعہ کی شام اچانک صورتحال بدل گئی۔ جیسے ہی پولیس موقع پر پہنچی، وہاں بھیڑ جمع ہوگئی اور خبر جنگل میں آگ کی طرح پھیل گئی کہ شوہر نے بیوی کو قتل کیا اور پھر خود تھانے جا کر سرنڈر کر دیا۔
پولیس نے لاش کو تحویل میں لے کر دُرگا پور محکمہ اسپتال بھیج دیا ہے۔ ملزم سے تفتیش جاری ہے اور قتل کی وجوہات جاننے کی کوشش کی جا رہی ہے۔ اس دردناک واقعے نے پورے علاقے کو جھنجھوڑ کر رکھ دیا ہے۔
