*کینیڈا لٹریچر فیسٹیول 2026 میں گونجا صوفی پیغام*
*حاجی سید سلمان چشتی نے دیا امن و محبت کا درس*
لکھنٶ(پریس ریلیز/ابوشحمہ انصاری)درگاہ اجمیر شریف کے چھبیسویں نسل کے سجادہ نشین اور چشتی فاؤنڈیشن کے صدر حاجی سید سلمان چشتی نے کینیڈا لٹریچر فیسٹیول 2026 میں شرکت کرکے عالمی سطح پر ہندوستان کی آٹھ سو سالہ صوفی روایت کا پیغام پیش کیا۔ تیرہ سے اٹھارہ مئی تک مسی ساگا اور ٹورنٹو میں منعقد ہونے والے اس بین الاقوامی پروگرام میں انہوں نے امن، بھائی چارے اور بین المذاہب ہم آہنگی کا پیغام دیا۔
حضرت مبارک خان شہید کمیٹی کے صدر اقرار احمد نے خوشی کا اظہار کرتے ہوئے کہا کہ صوفیائے کرام نے ہمیشہ دنیا کو محبت اور انسانیت کا درس دیا ہے۔ انہوں نے کہا کہ حاجی سید سلمان چشتی بیرونِ ملک ہندوستانی صوفی ثقافت اور گنگا جمنی تہذیب کو نئی شناخت دلا رہے ہیں۔
فیسٹیول کے دوران حاجی سید سلمان چشتی نے “ادیان کے سنگم: لامحدود کی تلاش” کے عنوان سے منعقدہ بین المذاہب پینل مذاکرے میں خصوصی مقرر کی حیثیت سے شرکت کی۔ اس پروگرام میں یعقوب میتھیو، لاما آریا ڈرولما، راکیش کول اور ہیری مان سمیت کئی بین الاقوامی شخصیات موجود تھیں۔ گفتگو میں روحانی یکجہتی، انسانیت اور زندگی کے گہرے مفاہیم پر تبادلۂ خیال کیا گیا۔
فیسٹیول کی خاص توجہ یعقوب میتھیو کی کتاب Seeking the Infinite: Maha Kumbh 2025 کی کینیڈا میں رسمِ اجرا رہی۔ اس موقع پر کینیڈا میں بھارت کے ہائی کمشنر دنیش کمار پٹنائک اور ٹورنٹو میں بھارت کے قونصل جنرل مہاویر سنگھوی بھی موجود تھے۔ دونوں عہدیداروں نے بھارت اور کینیڈا کے درمیان ثقافتی اور روحانی روابط کو مضبوط بنانے میں ایسے پروگراموں کی اہمیت پر زور دیا۔
نیل رائن تھیٹر میں منعقد خصوصی تقریب میں حاجی سید سلمان چشتی نے صوفیانہ کلام اور روحانی خطاب پیش کرکے سامعین کو مسحور کر دیا۔ انہوں نے کہا کہ چشتی صوفی روایت صدیوں سے محبت، خدمت اور انسانیت کا پیغام دیتی آ رہی ہے اور آج پوری دنیا کو جوڑنے کا سب سے مؤثر ذریعہ بھی یہی تعلیمات ہیں۔
